30 લાખની ખંડણીના ઈરાદે ભાવનગરના વેપારીનું અમદાવાદથી અપહરણ

જસદણના કુખ્યાત વસીમ કથીરીના કહેવાથી ખંડણી અપહરણનો પ્લાન ઘડવામાંં આવ્યો હતો: જસદણ નજીકના ડુંગરાળ વિસ્તારમાંથી પોલીસે રાજકોટના શખ્સને પીસ્તોલ સાથે ઝડપી વેપારીને મુકત કરાવ્યા :પ્લાન ઘડનાર માસ્ટર માઈન્ડ અને કારમાંથી નાસી છુટેલા ચાર શખ્સોની પોલીસ દ્વારા શોધખોળ

ભાવનગરમાં રહેતા ભંગારના વેપારીનું 30 લાખની ખંડણીના ઈરાદે અમદાવાદથી કારમાં અપહરણ કરાયા બાદ જસદણ લઈ જતા સમયે પોલીસે જસદણ નજીકના ડુંગરાળ વિસ્તારમાંથી અપહરણ કરનારની કારનો પીછો કરી ઝડપી લીધી હતી.

જો કે પોલીસ પકડે તે પહેલા ચાર શખ્સો નાસી છૂટ્યા હતા. જયારે રાજકોટના જંગલેશ્ર્વરમાં રહેતા શખ્સને પોલીસે દોઢ કિ.મી. પીછો કરી પીસ્તોલ અને ચાર જીવતા કાર્ટીસ સાથે ઝડપી લીધો હતો. પોલીસની પ્રાથમિક તપાસમાં જસદણમાં રહેતા અને હત્યા, હથીયાર સહિતના ગુન્હામાં સંડોવણી ધરાવતા કુખ્યાત વસીમ કથીરીના ઘરે વેપારીના અપહરણનો પ્લાન ઘટયો હોવાનું માલુમ પડતા પોલીસે ખંડણી અને અપહરણના આ ગુનામાં સંડોવાયેલ અન્ય શખ્સોને ઝડપી લેવા શોધખોળ હાથ ધરી છે.

મળતી વિગતો મુજબ જસદણ પોલીસ સ્ટેશનના પીએસઆઈ ડી.પી. ઝાલા તથા તેમનો સ્ટાફ પેટ્રોલીંગમાં હતો તે દરમ્યાન  બાતમી મળી હતી કે જસદણ નજીકથી એક શંકાસ્પદ કાર પસાર થનાર છે. જે બાતમીના આધારે જસદણના પાંચ ટોબરા તરીકે ઓળખાતા ડુંગર વિસ્તારમાં પોલીસે વોચ ગોઠવી હતી. દરમ્યાન નીશાન ટેરેના એલેકસ નંબર જીજે 18 બીડી 2047 નંબરની કાર પસાર થતા પોલીસે તેને રોકવાની કોશીષ કરી હતી. પરંતુ તેમણે કાર હંકારી મુકયા બાદ પોલીસે પીછો કરી કાર અટકાવી હતી. દરમ્યાન કારમાં બેઠેલા ચાર શખ્સો નાસી ગયા હતા. જયારે એક શખ્સને પોલીસે દોઢ કી.મી. પીછો કરી ઝડપી લીધો હતો.

આ શખ્સની અંગ ઝડતી લેતા તેના પેન્ટના ખીસ્સામાંથી પીસ્તોલ અને ચાર જીવતા કાર્ટીસ મળી આવ્યા હતા. તેનું નામ પૂછતા પોતાનું નામ રમીઝ સલીમભાઈ સેતા રહે. જંગલેશ્ર્વર રાજકોટ હોવાનું જણાવ્યું હતું. દરમ્યાન અહીં ઝાળીમાં સંતાઈ એક વ્યકિત બેઠા હોય પોલીસે તેમની પૂછપરછ કરતા તેમણે પોતાનું નામ અલ્તાફ હુસેન માસુમઅલી નાથાણી (ખોજા) (ઉ.44) રહે. ભાવનગર દેવબાગ, ઈલ્હરબાગ સોસાયટી, હોવાનું જણાવ્યું હતું. પોલીસે તેમની વિશેષમાં પૂછપરછ કરતા તેમણે જણાવ્યું હતું કે ગઈકાલે તેઓ અમદાવાદ જુહાપુરા વિસ્તારમાં મસ્જીદે નમાઝ પઢવા ગયા બાદ બહાર નીકળતા સમયે કારમાં આવેલા આ શખ્સોએ તેમને કહ્યું હતું કે તમારો એકાઉન્ટન્ટ મુરતુઝા પાસે અમારે પૈસા લેવાના બાકી છે અને તે અમારા ફોન ઉપાડતો નથી. બાદમાં તેઓ મને કારમાં બેસાડી અપહરણ કરી ગયા હતા. રસ્તામાં મારકૂટ કરી પીસ્તોલ બતાવી રૂા.30 લાખની ખંડણીની માંગણી કરી હતી. અને આંગડીયા મારફતે પૈસા મંગાવી આપવાનું કહ્યું હતું. અન્યથા જાનથી મારી નાખવાની ધમકી આપી હતી.

બાદમાં પોલીસે પીસ્તોલ સાથે પકડાયેલા આરોપી રમીઝ સેતાની પૂછપરછ કરતા તેણે આ સમગ્ર કાવતરા અંગે જણાવ્યું હતું કે બે દિવસ પૂર્વે હું તથા અકરમ રહે. રાજકોટ તથા સાજીદ સૈયદ રહે. ભાવનગર, સીકંદર ઉર્ફે બાપુ રહે. જુનાગઢ, અને ફૈઝલ ઉર્ફે પાવલી હુસેનભાઈ પરમાર, રહે. જસદણ, અમે બધા જસદણમાં રહેતા વસીમ ઈકબાલભાઈ કથીરીના ઘરે ભેગા થયા હતા. અને અહીં વસીમના કહેવાથી અમે ભાવનગરમાં અલંગ શીપયાર્ડમાં ભંગારનો વેપાર કરતા વેપારી અલ્તાફ હુસેન માસુમઅલી નાથાણી પાસેથી ખંડણી ઉઘરાવવા માટે અપહરણનો પ્લાન ઘડયો હતો. જે પ્લાન મુજબ વેપારીનું અપહરણ કરી જસદણના ડુંગરાળ વિસ્તાર તરફ લઈ જતા હોવાની કબુલાત આપી હતી.

બનાવની વધુમાં જાણવા મળતી વિગતો મુજબ જેમના અપહરણનો પ્લાન ઘડવામાં આવ્યો હતો તે વેપારી અલ્તાફહુસેન નાથાણીનું ભાવનગર ઉપરાંત અમદાવાદમાં મકાન આવેલુ છે. જયારે અપહરણના માસ્ટર માઈન્ડ વસીમ કથીરીનો ગુનાહીત ઈતિહાસ હોવાનું માલુમ પડયું છે તે અગાઉ હત્યાના ગુનામાં તેમજ 18 હથીયારના ગુનામાં, ફાયરીંગ સહિતના ગુનાઓમાં સંડોવાઈ ચુકયો હોવાનું માલુમ પડયું છે. પોલીસે હાલ આરોપી રમીઝ સેતાની ધરપકડ કરી છે. જયારે અન્ય આરોપી માસ્ટરમાઈન્ડ વસીમ કથીરી તથા કારમાંથી નાસી જનાર અકરમ નારેજા, સાજીદ સૈયદ, સીકંદર ઉર્ફે બાપુ અને ફૈઝલ ઉર્ફે પાવલીની શોધખોળ હાથ ધરી છે.