ઝડફિયા-ભાજપના નેતાઓને મારવા આવેલો છોટા શકીલનો શૂટર ઝડપાયો, અન્ય 1 ફરાર

મધરાતે અમદાવાદના રિલીફ રોડ પરની હોટલ વિનસમાં એટીએસનું જબરું ઓપરેશન: રાજ્યમાં છોટા શકીલ ગેંગના મનાતા બે શાર્પશૂટરો લોકલ કોન્ટેક્ટના આધારે પહોંચ્યા હતા : ઓપરેશન પાર પાડે તે પહેલા જ એટીએસને બાતમી મળતા હોટલ પર છાપો: મધરાતે એટીએસ ટીમ પર શાર્પશૂટરનો ગોળીબાર : એટીએસ વડા હિમાંશુ શુક્લાના નેતૃત્વની ટીમે આબાદ ઓપરેશન પાર પાડ્યું : નેતાઓની સુરક્ષા વધારવા આદેશ

ગુજરાતમાં આજે એક સનસનીખેજ ઘટનામાં ભાજપના પ્રદેશ ઉપપ્રમુખ ગોરધન ઝડફીયાની હત્યાના પ્લાનીંગ સાથે મુંબઈથી આવેલા શાર્પશૂટરની ધરપકડ કરવામાં આવી છે. અમદાવાદની રિલીફ રોડ પરની હોટલ વિનસમાં ગઇકાલે રાત્રે એટીએસની ટીમ ત્રાટકી હતી અને અહીં છૂપાયેલા બે શાર્પશૂટરને ઝડપવા માટે તૈયારી કરી હતી.
આ સમયે જ એટીએસની ટીમ પર ફાયરીંગ થયું હતું અને આ અફડાતફડીમાં એક શાર્પશૂટરને નાસી છૂટવામાં સફળતા મળી છે જોકે એટીએસની ટીમે બીજા શાર્પશૂટરની ઝડપી લીધો છે. ગૃહ રાજ્યમંત્રી પ્રદીપસિંહ જાડેજાએ માહિતી આપતા જણાવ્યું હતું કે બંને શાર્પ શૂટરો ઝડફીયાની હત્યા માટે અમદાવાદ આવ્યા હતા અને તેની માહિતી મળતાં જ સમગ્ર ઓપરેશન પાર પાડવામાં આવ્યું છે. અને ઝડફીયાની હત્યાનો પ્રયાસ નિષ્ફળ બનાવાયો છે.
ગુજરાત પોલીસને મળી જતાં એટીએસ દ્વારા ગઇકાલે રાત્રિનાં ઓપરેશન હાથ ધરાયું હતું. અને તેમાં એક શાર્પશૂટર ઝડપાઈ ગયો છે. સુત્રોના જણાવ્યા મુજબ આ હત્યા માટે પાકિસ્તાનથી સોપારી અપાઈ હતી. અને છોટા શકીલ ગેંગના બે શાર્પશૂટરો મુંબઈથી અમદાવાદ સમગ્ર કાવતરું પાર પાડવા આવ્યા હતા પરંતુ આ અંગેની ગંધ આવી જતા તે નિષ્ફળ બનાવાયું છે.
એટીએસના વડા હિમાંશુ શુક્લાના નેતૃત્વ હેઠળ ડીસીપી દીપેન ભટ્ટ, એસીપી કે.કે. પટેલ તથા એસીપી ભાવેશ રોઝીયાના નેતૃત્વમાં એટીએસની ટીમે આ સમગ્ર ઓપરેશન કર્યું હતું. ગઇકાલે રાત્રે જ એટીએસની ટીમ રિલીઝ રોડ પરની વિનસ હોટલની આસપાસ ગોઠવાઈ ગઇ હતી. અને ઓચિંતા જ હોટલની અંદર છાપો મારીને શાર્પશૂટર જ્યાં રોકાયા હતા તે રુમનું બારણું તોડીને અંદર પ્રવેશી અને તૂર્ત જ બંને શાર્પ શૂટરને ઝડપવા માટે કામગીરી કરવામાં આવી હતી.
આ બને મુંબઈથી આવ્યા હોવાનુંં ખુલ્યું છે અને તેના એક લોકલ કોન્ટેક્ટ પણ હોવાનું માનવામાં આવી રહ્યું છે. જેની પણ હવે એક શાર્પ શૂટરની પૂછપરછમાં માહિતી ખુલશે તથા આ સમગ્ર ષડયંત્રમાં સ્થાનિક અને મુંબઈ તથા છેક પાકિસ્તાન સુધી તાર પહોંચે છે તેની પણ એટીએસ તપાસ કરશે. આ ઘટના એ સમગ્ર રાજ્યમાં જબરી સનસનાટી મચાવી છે અને ગુજરાત ફરી એક વખત માફિયા અને ત્રાસવાદીના ડોળા પર હોવાનું જાહેર થયું છે.