રાજકોટના જંગલેશ્વરના 8 દર્દી આજ રોજ રજા અપાઇ, 16 વર્ષના તરૂણથી લઇ 84 વર્ષના વૃદ્ધએ કોરોનાને પરાસ્ત કર્યો

રાજકોટમાં અત્યાર સુધીમાં 24 દર્દી સાજા થયા

રાજકોટના જંગલેશ્વરમાં રહેતા 8 કોરોના પોઝિટિવ દર્દીના રિપોર્ટ નેગેટિવ આવતા એકસાથે આઠેયને રજા આપવામાં આવી હતી. આઠેય દર્દીને સિવિલ હોસ્પિટલમાંથી રજા અપાઇ ત્યારે હોસ્પિટલ સ્ટાફે તાળીઓના ગડગડાટ કર્યો હતો અને તમામને વિદાય આપી હતી. રજા મળતા જ દર્દીઓએ હોસ્પિટલ સ્ટાફનો આભાર માન્યો હતો. તેમજ સિવિલ હોસ્પિટલના ડોક્ટરોની સારવારના વખાણ કર્યા હતા. 8 દર્દીમાં 16 વર્ષના તરૂણથી લઇ 84 વર્ષના વૃદ્ધએ કોરોનાને પરાસ્ત કર્યો છે. એક મહિલાએ જણાવ્યું હતું કે, અમને બહુ સારી રીતે સાચવ્યા હતા. ઘરના સભ્યોની જેમ અમારી સાથે વર્તન કર્યું હતું. રમજાન મહિનો ચાલી રહ્યો છે હવે ઘરે જ ઇબાદત કરીશું અને આ કોરોનાની મહામારીમાંથી દેશ બહાર આવે તેવી પ્રાર્થના કરીશું. તમામ દર્દીને સિટી બસ મારફત ઘર સુધી મુકી જવામાં આવ્યા હતા.