લગ્નના 11 વર્ષ બાદ શિલ્પા શેટ્ટી સરોગેટ દીકરીની માતા બની, નામ સમીશા રાખ્યું

 બોલિવૂડ એક્ટ્રેસ શિલ્પા શેટ્ટી કુંદ્રા બીજીવાર માતા બની છે. સરોગસીની મદદથી શિલ્પા શેટ્ટીના ઘરે દીકરીનો જન્મ થયો છે. શિલ્પાએ સોશિયલ મીડિયામાં દીકરીના હાથની તસવીર શૅર કરીને આ વાતની માહિતી આપી હતી.

15 ફેબ્રુઆરીએ જન્મ થયો
દીકરીની તસવીર શૅર કરીને શિલ્પા શેટ્ટીએ કહ્યું હતું, ઓમ ગણેશાય નમઃ અમારી પ્રાર્થનાઓનો જવાબ મળી ગયો. અમને એ જણાવતા આનંદ થાય છે કે લિટિલ એન્જલે અમારા ઘરે પગલાં પાડ્યાં છે. સમીશા શેટ્ટી કુંદ્રા. સમીશાનો જન્મ 15 ફેબ્રુઆરી, 2020ના રોજ જન્મ થયો હતો. ઘરમાં જુનિયર SSK આવી ગઈ.

2009માં લગ્ન કર્યાં હતાં
શિલ્પા શેટ્ટીએ બિઝનેસમેન રાજ કુંદ્રા સાથે વર્ષ 2009માં 22 નવેમ્બરના રોજ લગ્ન કર્યાં હતાં. લગ્નના ત્રણ વર્ષ બાદ એટલે કે વર્ષ 2012માં શિલ્પાએ દીકરા વિયાનને જન્મ આપ્યો હતો. લગ્નના 11 વર્ષ બાદ શિલ્પા બીજીવાર માતા બની છે.

13 વર્ષ બાદ કમબેક
શિલ્પા શેટ્ટી બોલિવૂડમાં 13 વર્ષ બાદ શબ્બીર ખાનની ફિલ્મ ‘નિકમ્મા’થી કમબેક કરી રહી છે. આ ફિલ્મમાં અભિમન્યુ દસાની તથા શર્લી સેટિયા છે. આ ફિલ્મ જૂન મહિનામાં રિલીઝ થશે. આ ઉપરાંત શિલ્પા શેટ્ટી ડિરેક્ટર પ્રિયદર્શનની ફિલ્મ ‘હંગામા’માં પરેશ રાવલ સાથે કામ કરી રહી છે.

આમિરથી લઈ એકતા કપૂર સરોગેટ બાળકના પેરેન્ટ્સ છે
છેલ્લાં કેટલાંક સમયથી બોલિવૂડમાં સરોગસીનો ટ્રેન્ડ ચાલુ થયો છે. આમિર ખાન-કિરણ રાવનો દીકરો આઝાદ સરોગેટ બાળક છે. શાહરુખ-ગૌરીનું ત્રીજું સંતાન અબરામ પણ સરોગેટ બાળક છે. સલમાન ખાનના ભાઈ સોહિલ ખાનના બીજી દીકરા યોહાનનો જન્મ સરોગસીથી થયો હતો. આ ઉપરાંત સની લિયોની-ડેનિયલ પણ સરોગસીની મદદથી ટ્વિન્સ બાળકોના પેરેન્ટ્સ બન્યા છે. તુષાર કપૂર તથા એકતા કપૂર સિંગલ ફાધર તથા સિંગલ મધર છે અને તેમને પણ સરોગસીની મદદ લીધી હતી. કરન જોહરે પણ સરોગસીની મદદથી સિંગલ ફાધર બન્યો છે. તેને ટ્વિન્સ બાળકો છે. શ્રેયસ તળપદે તથા તેની પત્ની દિપ્તી સરોગસીની મદદથી દીકરી આદ્યાના પેરેન્ટ્સ બન્યા હતાં. લિઝા રે પણ સરોગસીની મદદથી ટ્વિન્સ દીકરીની માતા બની છે.

સરોગસી એટલે શું?
જ્યારે પતિ-પત્ની કોઈ કારણોસર બાળકને જન્મ ના આપી શકે ત્યારે સરોગસીની મદદ લેવામાં આવતી હોય છે. આમાં કોઈ સ્વસ્થ મહિલા અન્ય યુગલના બાળકને જન્મ આપે છે. આવી માતાને સરોગેટ માતા કહેવાય છે. આ આખી પ્રક્રિયા નાણાકીય રીતે થતી હોય છે. આ પ્રક્રિયામાં સરોગેટ માતાનું શોષણ થતું હોવાનું ફરિયાદ અવાર-નવાર થતી હતી. આથી જ આખી સરોગસીની પ્રક્રિયાને કાયદાની મર્યાદામાં લાવવા માટેનું એક બિલ લોકસભામાં 2019માં પાસ કરવામાં આવ્યું હતું. જોકે, હવે આ બિલને રાજ્યસભામાં સંસદીય સમિતિ પાસે મોકલવામાં આવ્યું છે.