સુશાંતસિંહ રાજપૂત આત્મહત્યા કેસની તપાસ સીબીઆઈને સોંપતી સુપ્રિમ કોર્ટ

બિહાર અને મહારાષ્ટ્ર વચ્ચે ‘સેન્ડવીચ’ બનેલા કેસમાં મહત્વપૂર્ણ ચૂકાદો : મુંબઈ પોલીસને ફટકો : બિહારમાં નોંધાયેલી એફઆઈઆર તથા મુંબઈ પોલીસની તપાસ સહિતની કામગીરી સીબીઆઈને સોંપવા આદેશ : મહારાષ્ટ્ર પોલીસે સહકાર આપવાનો રહેશે

સમગ્ર દેશમાં ચર્ચાસ્પદ બનેલા બોલીવૂડ અભિનેતા સુશાંતસિંહ રાજપૂત આત્મહત્યાની તપાસ સીબીઆઈ કરશે. બિહાર અને મહારાષ્ટ્ર વચ્ચે પ્રતિષ્ઠાનો જંગ બની ગયેલા આ કાનૂની વિવાદમાં આજે સુપ્રિમ કોર્ટના ન્યાયમૂર્તિ ઋષિકેશ રોયે તેમનો ચૂકાદો જાહેર કરતાં પટણામાં સુશાંતના પિતાએ જે એફઆઈઆર દાખલ કરી છે તેને યોગ્ય ગણાવી હતી. સીબીઆઈને તપાસ સોંપવાના બિહાર સરકારના નિર્ણયને પણ માન્ય રાખ્યો હતો જ્યારે આ તપાસ કેન્દ્રીય એજન્સીને સોંપવાના મહારાષ્ટ્ર સરકારના વિરોધ ફગાવ્યો હતો અને જણાવ્યું હતું કે પટણામાં નોંધાયેલી એફઆઈઆર તથા મુંબઈમાં પોલીસ દ્વારા જે કાઇ તપાસ થઇ છે તે તમામની સંયુક્ત તપાસ સીબીઆઈની ટીમ કરશે અને ભવિષ્યમાં પણ કોઇ નવી એફઆઈઆર નોંધાય તો તેની તપાસ પણ સીબીઆઈ જ કરશે. આમ સુપ્રિમ કોર્ટના ચૂકાદાથી મહારાષ્ટ્ર સરકારને મોટો ફટકો પડ્યો છે તો સુશાંતની એક સમયની ગર્લફ્રેન્ડ રિયા ચક્રવર્તીએ પણ પટણાની એફઆઈઆર મુંબઈ ટ્રાન્સફર કરીને મહારાષ્ટ્ર પોલીસ તપાસ કરે તેવી કરેલી માગણી પણ ફગાવી દીધી છે.
સુપ્રિમ કોર્ટે આજે પોતાના ચૂકાદામાં જણાવ્યું હતું કે સુશાંતની આત્મહત્યાની તપાસ માટે તેના કુટુંબ દ્વારા સીબીઆઈને કેસ સોંપવા જે માગણી કરવામાં આવી છે તે યોગ્ય છે અને મહારાષ્ટ્ર પોલીસ આ તપાસમાં સીબીઆઈને તમામ સહકાર આપશે. તથા જે કાઇ જરુરી હશે તે તમામ દસ્તાવેજો તથા પૂરાવા મુંબઈ પોલીસ પાસે છે તે સીબીઆઈને સોંપી દેવામાં આવશે.
આમ સમગ્ર કેસે એક રસપ્રદ વળાંક લઇ લીધો છે. રિયા ચક્રવર્તીને પણ હવે સીબીઆઈ તપાસનો સામનો કરવો પડશે જ્યારે સુશાંતની બહેનો શ્ર્વેતા અને કીતિર્ર્ બંનેએ પણ સીબીઆઈ તપાસને વધાવી લીધી છે. સુપ્રિમ કોર્ટ દ્વારા આ અંગે હવે અપીલ માટેની મહારાષ્ટ્ર સરકારની કોઇપણ અરજી નહીં સ્વીકારવા નિર્ણય લીધો છે.