ભાવનગરમાં રોડ પર યુવકની તીક્ષ્ણ હથિયારના ઘા ઝીંકી કરાઈ હત્યા

ભાવનગરના સત્યનારાયણ રોડ ખાતે મહાવીર હાર્ડવેર નામની દુકાનમાં નોકરી કરતા રાજુ મકવાણાની તિક્ષ્ણ હથિયારના ઘા ઝીંકી નિર્મમ હત્યા કરવામાં આવી હતી.

ભાવનગર :  શહેરમાં  ગુરૂવાર રાતે એક યુવાનની અનૈતિક સંબંધને મામલે હત્યા થઈ હોવાની ઘટના સામે આવી છે. શહેરના સત્યનારાયણ રોડ પર આવેલી મહાવીર હાર્ડવેર નામની દુકાનમાં કામ કરતા રાજુ ઉર્ફે અજય મકવાણા નામના યુવાનને અશોક ખીમાણીયા નામના ઇસમે છરીનાઘા ઝીંકી ઘાતકી હત્યા કરી છે. 

પ્રાપ્ત વિગત અનુસાર રાજુભાઇ મકવાણા સત્યનારાયણ રોડ પર આવેલા મહાવીર હાર્ડવેરમાં નોકરી કરે છે. રાજુની હત્યા કરનાર વ્યક્તિ સાયકલ પર આવીને દુકાનમાં જઇને તીક્ષ્ણ હથિયાર વડે આડેધડ ઘા મારીને તેની હત્યા કરી દીધી હતી. હત્યા કર્યા બાદ આરોપી પોતે પોલીસ સ્ટેશનમાં હાજર થઇ ગયો હતો. આ બનાવના પગલે એલસીબી, એસઓજી તથા નિલમબાગ પોલીસ સ્ટેશનનો સ્ટાફ ઘટના સ્થળે પહોંચી ગયો હતો. પોલીસે મૃતદેહ પોસ્ટમાર્ટમ માટે મોકલી આગળની કાર્યવાહી હાથ ઘરી હતી.